تكلمت بـ تدوينة ماضية عن مؤتمر GDC
كنت مرة متضايقه لأن المؤتمر بيفوتنا بنفس الوقت متفائلة خير ♥..
وفعلاً .. الحمدلله إني مارحت أول يوم لأن الدعوى كانت خلطبيطا وكركبه شوي 
.. والوضع مارح يكون مريح بالنسبه لي
طبعاً المؤتمر كان 3 أيام :
الأحد اللي فيه اختباري ، وصعب جداً أروح
الاثنين كنا نحسبه راح علينا التسجيل والحضور فـ مارحنا مع إنه كان Day off .
بهذا اليوم حضرت وحدة من صديقاتي ولما رجعت خبرتني إن التسجيل مستمر والحضور مسموح بأي وقت والشهادة تنعطى بمجرد حضورك !!
انقهرت جداً ! لأن اليوم فاتني وكنت بالمرة فاضيه ولابقى إلا يوم واحد الثلاثاء وعندي فيه محاضرتين الصبح وكم شغله بالبنك واجتماع المشروع وخرابيط ثانيه :]
بس جلست مع نفسي جلسه وسويت ميزان القرارات الخطير حقي وتغلبت أسباب حضور المؤتمر على الدوام (^^.)♥
عملت اتصالاتي مع البنات .. اقنعت اللي ماقتنع وشجعني اللي كان متحمس من أول .. وقررنا نروح 
كان يلزمني أعبي فورم “ماله داعي” يؤكد موافقة ولي الأمر على روحتي مع باص الجامعة .. طيب انا كبيرة ! بلاش حركات ولي الأمر هذي !
وقعنا وتحمسنا خططنا لأشياء “جميلة” مرة نسويها بالباص بما أن الطريق طويييل لمكان المؤتمر واللي كان في جامعة اليمامة
\
صباح الثلاثاء .. وفي بوابة الباصات .. كنا 4 خطيرات : أنا – أسما – منيرة – هديل ♥
بعد ماتم استلام الموافقات ومصادرة بطاقاتنا الجامعية لضمان العودة : ) ركبنا النقل الجماعي الكشخه ..
مامدانا نريح على الكراسي الملكية ، إلا وينقلونا للباص الصغير، الضيق الممل :\ اللي كله حميميه على قولة الخطيرة منيرة
وانطلقنا -بعد انتظار طوييييل – إلى المؤتمر : )
كان عددنا مايتجاوز الـ 20 بنت اضافة الى مرشدتين ( اداريتين ) لزوم الحراسه وكذا !
\
لماوصلنا اتجهنا لمقر التسجيل سجلنا وأخذنا الـ badge ودخلنا أول قاعه بطريقنا
القاعة كانت كبيرة حيـــــل وشبه مقسومه .. الجزء الأمامي (الأكبر) كان نصيب الذكور .. والخلفي (الأصغر والأظلم) للإناث ، هنا .
لحقنا على نص المحاضرة وكانت عن Building Amazing Business Application with Silverlight 3 and Microsoft.Net RIA Services
وعن نفسي عجزت لا أركز أبد .. مرة كان الجو جديد علي وغريب (^^.)
لما قربت تنتهي المحاضرة قرينا الـ أجنده اللي توزعت علينا أول مادخلنا و”اكتشفنا ” ان السالفه تراكات وعلى كيفك تختار المحاضرة اللي تعجبك وتروح لها
التراك الثاني كان مخصص للإناث فقط ، وموقعه بـمبنى ثاني ، في مكتبة الجامعة << اللي خقينا علينا مرررة -مقارنة بمكتبة الجامعة الفتاكه ..
وأحلى شي ، فيها أماكن خاصه لشحن اللاب توب =”( ♥ << حتى الشواحن موفرينها بس يجي الواحد ويشبكه بجهازه =”( !!!
بين كل محاضرة وثانيه بريك ، وفيه بوفيه فطور وغدا موجود طول الوقت .. وكويس على حظنا كان هذاك اليوم المكان أريح من قبل .
أول ماطلعنا من قاعة التراك الأول كانت الساعه تقريباً10 شافتنا البنت اللي سجلتنا وقالت لو حابين أسويلكم شهادات حضور من الحين !!
ممم المحاضرة الثانيه حضرناها بالتراك الثاني وكانت عن الـ Share Point 2010 وهي حلقة نقاش عن الموضوع هذا أكثر مما هي محاضرة << لأنه كان متكلم عنها بالتفصيل قبل بيوم .
المحاضرة الثالثه كانت أحلى شي ، موضوعها Windows mobile for Developer الموضوع مرة كان ممتع ^_^ واستفدت منه مرة .
بعد ماخلصت المحاضرة الثالثه صار لازم نودع المؤتمر لأن الساعه صارت 3 .. وباصات الجامعة تتحرك هذا الوقت
أول ماركبنا طلبو مننا المرشدات نكتب في ورقة أسامينا ورأينا عن المؤتمر .. حنا أخذناه من باب انو المؤتمر يبغون رأينا بهدف التطوير وكذا
ماتوقعناه بـ ينّشر في رسالة الجامعه هنا p= والا كان اختلف الوضع تماماً
طريق الرجعه مرة كان يونس ♥ مع البنات الخطيرات السالف ذكرهن p= ♥
تعرفنا على معالم مدينة الرياض والأماكن المهمه لكل خطيرة مننا p= ♥
مع انه كان يقهر .. تقريبا أغلبنا مرينا من عند أحياءنا بس كنا مضطرين نرجع للجامعة ومنها نركب سياراتنا الخاصه ونرجع لبيوتنا ><” !
\
اليوم هذا كان تجربه جديده بالنسبة لي .. والروحه مع البنات لها نكهه خاصه ♥
رجعت للبيت محمله بـ شهادة و كيس قماشي يحمل شعار المؤتمر و بعض الكتيبات و Visual Studio 2010 CD ♥
يارب عاد ينحسب علينا بونس لمادة التجارة الالكترونية على حضورنا ، لأننا كنا مضغوطين حد اللي مالهوش حد ، نزعنا أنفسنا من عز الشغل وأجبرنا أنفسنا نروح نحضرة !
